茶餐廳亂話（1086）回流插班生

　　今早去到茶餐廳，有一位冇見一排的客人在座，佢呻到樹葉都落，理由是他的老婆唔滿意香港政府，個仔唔想在香港讀書，於是用BNO移民去英國，一切都很順利，但搵學校的時候就很麻煩，要讀得好一定要讀私立中學，不過就好貴，而且讀私校，不需要移民咁大陣仗，如果讀公立中學，不但同學們來自五湖四海，而且學術水平很參差，學校為了遷就那些學術水平不高的同學，將課程降低，個仔見到唔對路，立即話要返香港讀書。

　　客人當然求之不得，因為在英國行公園，已經行了幾個月，再唔返香港就變成維園阿哥，不過，回流之後，兒子以前所讀的Band 1學校已經冇位，唯有退而求其次申請入Band 2，希望有位，客人話，今次當買個教訓，不過亦有度好，回港之後，佢老婆同個仔再沒有日日話香港點唔好，點唔好。