今早去到茶餐廳，見到一個客人口腫鼻腫，他不斷同人講是自己跌親，唔關任何人士，在茶餐廳食早餐的人大多數老奸巨猾，知道事情不會那麼簡單，話自己跌親即是此地無銀三百兩，不過，冇人問那位客人。
那位客人走了之後，各人問老闆知不知道來龍去脈，老闆話當然不是自己跌親，而是爭泊車位向人挑釁，被人打了幾拳，不過，客人亦算高，就算口腫鼻腫都唔承認被人打，只是話自己跌親，仲叫大家唔好問那位客人，這點大家當然明白。
英國佬同那位客人差不多，驅逐艦無畏號帶同兩個記者上船去黑海，挑釁俄羅斯的領海主權，被俄羅斯開炮警告，英國政府竟然唔敢承認，仲話俄羅斯冇開炮，如果唔自己帶記者上船，或者有人會信，記者即場報道，想抵頼都唔得，估計那位艦長一定會被燉冬菇，有文職做都唔錯。
今次最終受害者應該是美國佬，自己條靚被人恰都唔敢承認，做大佬做到咁窩囊，都算少見，澳洲加拿大更加驚，英國尚算有多少實力，如果在南海遇上中國的戰艦，究竟應該是戰抑或退，這是一個問題。
