今早去到茶餐廳，老闆話政府終於守得雲開見月明，昨日接種疫苗人數超過4萬2，估計在疫苗到期之前可以全部用哂，今次真係多謝兩位地產商，點解政府的智囊團諗唔到這個方法，我話如果政府有留意分析員意見，我的經濟午餐拍擋早在一月份都已經表明，如果要谷針，送樓冇得慳，我絕對同意，不過，這招是殺手鐧，在絕對下風時才可以採用，有機會扭轉形勢，如果一開始就採用，不但不能夠得到預期效果，可能仲惹來非議，以香港政府的弱勢，這招是唔敢出。
而事實上在香港的接種疫苗情況亦不是太差，已經有200萬人接種，現在每日大約有1萬，只要多300日，當有500萬人接種，就可以達到群體免疫，時間可以等，但要承受巨大經濟損失，其實，有很多人想打疫苗，但礙於以往曾經講過疫苗是無用，所以遲遲不打，大抽獎是一個破發點，有咁好機會得一層樓，執輸行頭慘過敗家，所以就算改變初衷都沒有人質疑。
有客人話已經有樓，如果抽中要俾30%印花稅，即時賣走除了要俾30%印花稅之外，還要俾20%SSD，只得半層樓落袋，老闆話很簡單，政府應該免收印花稅，不過，如果即時賣走，就要付20%SSD，政府夠唔夠膽這樣做，這是另外一個問題。
