茶餐廳手記（#057）千祈唔好借人頭買樓

　　今早去到茶餐廳，有客人問，大埔碎屍案的來龍去脈，老闆話，真正原因只有當事人才知道，恩恩怨怨其他人很難了解，不過，最直接推測就是受害者為了慳10.75 ％（15-4.25）辣招稅而問疑兇借人頭買樓，最後疑兇唔肯賣樓，唯有出此下策，都係辣招稅累事。

　　今次事件對樓市敲起一個警號，在物業市場，有不少業主在買第二個住宅單位時，為了避免繳付辣招稅，都會借人頭買樓，其實是很危險，因為隨時收唔返，如果告上法庭，問人借人頭買樓的人首先犯法，他有心逃稅，最低限度要繳付三倍稅款，但已經是最好結果，如果借出人頭的人唔認，即使簽落一些什麼信託紙都冇用，或者要睇個官點判，而且，出現信託紙就即是有心逃稅，協助做信託紙的律師可能有責任，律師亦不會主張出示信託紙追樓，所以，問人借人頭買樓的人要有收唔返的心理準備，比借了筆錢俾人更難收返。