今日早上去到茶餐廳，有客人話美國加息的主要目的是壓通脹，全世界的分析師、政治家都是這樣講，應該唔會錯，老闆大娘唔同意。大娘話客人呃佢膝頭哥唔食辣椒醬，大豆芽菜炒豬腸，加息究竟點解可以壓通脹，沒有一個經濟學者講出來，加息壓通脹只是一個口號。
老闆大娘話如果加息壓通脹的理論講得通，業主加租，物料加價，一樣可以壓通脹，而事實上加息令到各種不同物品加價，營運成本上升，最後茶餐廳就要以抵受不住通脹壓力加價，加息壓通脹是世界上最大謊言，不過，不少有識之士信到十足十。
有客人話，加息的作用就是令到消費的人肉痛，例如茶餐廳大幅加價，一定會有部份客人減少幫襯，導致生意唔好，老闆就要減價，大多數學者都是以這個理論解釋加息壓通脹。老闆大娘話，這簡直是一個謊言冚一個謊言，生意唔好就要減價，生意人知道，殺頭生意有人做，蝕本生意冇人做，如果長期蝕本，不如執咗佢。茶餐廳的數目減少，每一間茶餐廳幫襯的人數就會增加，通脹一樣會出現。學者講的只是理論，叫他們做吓生意就知道。
其實，抗通脹最好辦法就是提高失業率，現在美國失業率是3.6%，如果能夠提升至10%，代表有不少人沒有收入，減少消費，生意減少，商品自然會減價，通脹便會下降甚至消失。不過，這只是旁門左道，好似「九陰真經」一樣，唔係怪怪地的人都唔會學，更加唔會用。不過，這個理論比加息抗通脹更加實際。
