馬斯克荷蘭式拍賣鋤價

　　十幾年前我們公司買一幢大廈，對方是海外機構，所有條件，成交日期，什麼什麼也傾妥，租金提供的回報亦不低於市值，但在成交前兩個星期，我發覺業主提供的租金回報是經過刻意調整，否則就會大幅低於市值，原因是業主給予租客不合理的免租期，於是要求取消成交或者業主減價，經過一番擾攘，最後業主減價，我當然被業主的伙記鬧到失暈，話我用荷蘭式拍賣鋤價，其實我沒有，業主是有權唔賣，雖然事情隔了咁多年，但到現在，仍然有不少業主在賣樓時會整靚啲租約，但又唔聽到有人以租約回報未能反映真正市值來鋤價，或者，買家在還價時已經計好條數，根本鋤無可鋤。

　　電車佬馬斯克以440億美元收購Twitter ，到最後一刻以Twitter 用戶有發水20-25％之嫌鋤價，收購亦立刻終止，Twitter 股價亦大幅下跌，我估計今次馬斯克用荷蘭式拍賣鋤價，絕對唔相信馬斯克事前唔知道Twitter 用戶數目有大幅發水，只是馬斯克先鎖定收購最高價，然後慢慢鋤價，並且接受Twitter 將用戶數目發水5％，Twitter 亦唔敢答應，代表Twitter 真的有將用戶數目發水，就算雙方取消交易，Twitter 股價亦很難回復正常，想唔賣都唔得，馬斯克這招真係高，就算Twitter 方面唔賣，亦不能沒收馬斯克10億誠意金，最後我估計馬斯克一定可以鋤到價，至於鋤到幾多，就要睇馬斯克功力，估計不會少於兩成，持有Twitter 股票的人今次真係被馬斯克玩死。