仇人才會借錢畀你去炒樓

　　做生意咁多年，間中亦有人問我借錢買樓，大多數是炒樓，我話如果我是對方的仇人，一定會借錢給他們，可惜我唔係，所以我唔會借，因為我知道，就算樓價升了，他們亦不會還錢給我，仲話比我知樓價升了，叫我不用擔心他們冇錢還，老實說，都唔知道何年何月才有錢還，直到樓價下跌，那些人就會話，倘若當日我沒有借錢給他們，就唔使累到他們蝕錢，除了我借的款項之外，還有畢生積蓄，要他們還錢或者要等來世。其實，這些故事以不同形式不斷上演，結果都是悲劇收場，既然大家都知道這個結局，點解仲要借錢畀人炒樓。

　　政府在香港疫情最嚴峻的時候推出林鄭plan2.0，其實有很大風險，不少人知道樓市正在下跌，但抵受唔到高成數按揭誘惑，隨時利用家人的名字買多一層樓，樓價上升當然是好，但仍然唔輪到政府領功，只是買樓的人眼光準確，倘若樓價下跌就大件事，那些買家一定會鬧政府幫地產商，如果唔係，點解要在疫情高峰，仍然封關的時候推出林鄭plan2.0，吸引那些未及資格的人去買樓，除非政府同市民有仇。