納米樓浪費了不少購買力

　　幾年前納米樓推出的時候，有不少人仲歌頌地產商，願意為上車人士度身定做，原因是納米樓可以申請九成按揭，由於反應熱烈，納米樓的單價雖然不貴，但呎價絕不便宜，當時有人話細價樓，真架勢。

　　我不時撰文話納米樓浪費了不少資源，有不少買了納米樓的人寧願空置，也不願住納米樓，或者只住了一段短時間便搬走，任由納米樓空置，浪費了不少房屋資源。

　　大家都知道香港人只能買一個住宅單位，如果買第二個就要畀15%特別印花稅，有不少人將自己珍貴配額浪費了在納米樓，到現在樓價下跌，選擇又多，反而沒有配額買樓，變成浪費了不少購買力。

　　有很多人抱怨政府，明明是600萬以下樓宇才可以做九成按揭，但突然間改至1000萬，如果他們早知有咁大升幅，就唔會考慮買納米樓，老實說，政府的確做錯，但改好過唔改，如果不是將九成按揭推高至1000萬，現在有更多納米樓出現，浪費更多購買力，政府覺今是而昨非，唔好太過苛求。