最受歡迎的老師

　　有一個與我一起讀小學的星架坡朋友同我講，今次香港真係輸九條街，有一個調查，講全世界最受出國工作僱員喜歡的地方，沒有意外，星架坡又排第一，香港下跌了十九位，排七十幾，今次，香港想唔認衰都唔得。

　　我話在星架坡面前，香港人根本抬唔頭，我反問小學同學，既然星架坡咁好，點解又要嚟香港工作，小學同學話，如果唔計外勞，星架坡對到來工作的外籍人士是非常優待，但是星架坡人在星架坡工作又唔係咁值錢，所以優質的星架坡人反而會離開，同學這個論調我覺得有多少奇怪，不過，到星架坡工作的人見到這個情況，自然會對星架坡好感，好似有一個朋友嚟食飯，他將雞髀給了客人，自己與家人食雞胸，一定會得到客人好感。

　　老實說，到星架坡打工的外籍人士好似遊牧民族，總有一日，星架坡政府不能滿足他們的要求，或者其他地方有更好的待遇，那些人便會離開，這個銜頭不攞也罷，同學冇乜表情。

　　我問同學記唔記得大家讀小學時，到下學期學校一定會叫同學寫一篇文章叫「我最喜愛的老師」，小朋友沒有什麼機心，大家都會選出一位俾分很手鬆，並不嚴厲的老師，小朋友並不知道，最受歡迎的老師其實是一道催命符，學校會檢討那位老師的教學方法，隨時會開除教席，而不受歡迎的老師反而唔使擔心，是否很奇怪，而事實上，學校需要的是教學非常嚴厲的老師，確保學校成績處於領導地位，所以，今次星架坡得到最受出國工作僱員喜歡的地方並不是好事，不過，香港去到七十幾又當然唔好，唔知道內情的人以為去香港工作，隨時會被拉入大陸坐監。

　　外籍僱員在星架坡的確優哉游哉，日日都好似放假，得閒又可以去賭場玩兩手，有兩三日假期，唔去吉隆坡檳城，都可以去布吉溝吓女，有咁嘅工作環境，有乜辦法不是受到去外國工作的打工仔歡迎。