今次新冠疫情第五波大爆發，確診數字已經每日超過六千人，而且會陸續增加，有專家話將會有二十五萬人確診，但有專家唔同意，認為確診數字大幅高於二十五萬人，甚至去到全民確診，今次真係唔見棺材唔流眼淚，我反而認為疫情大爆發有助提高疫苗接種率，長遠來說是一件好事，否則唔知道幾時才可以達成九成接種率，沒有足夠接種率，香港很難與國內以及世界各地通關。

　　老友話我太樂觀，老實說，我的確是一個樂觀的人，凡事向好的一方面去想，否則就唔會解決問題，有病去睇醫生都是樂觀，認為醫生會醫番好自己，如果悲觀，諗住冇得醫，就無謂浪費時間金錢去睇醫生。

　　很多人不明白，點解疫情會出現第五波，而且仲大大鑊，前四波確診人數總和都不及第五波，我講大家都唔會相信，就是香港政府在前四波做得非常好，不但令香港市民失去警覺性，甚至連政府高官都失去警覺性，否則就不會出現生日派對事件，大家都認為新冠病毒不外如此，即使全世界的確診人數非常多，但香港人仍然唔肯積極面對，沒有做足防疫措施，所以，如果要怪政府，就應該話政府防疫工作做得太好。

　　全世界任何國家或者地區，如果有足夠疫苗的話，接種率大多數是九成上下，香港在疫情第五波未爆發前，只得七成半，而事實上政府已經想盡辦法迫市民打疫苗，但始終都做唔到，甚至連進入餐廳要打疫苗都做唔到，即使現在禁晚市堂食，一般餐廳只准坐兩個人，但進入餐廳仍然可以不用打疫苗，由此可見，香港政府如何弱雞，全世界國家話禁就禁，今晚講，翌日早上就開始禁，唔似得香港，到2月24日進入餐廳才要打疫苗，有老友話，不是香港政府弱雞，而是飲食界人強馬壯，我覺得老友所講亦有道理，不如飲食界搵人去競選做特首，機會率應該幾高。

　　現在疫情去到最壞時候，反而是最好時候，大批市民排隊打疫苗，做測試，估計在2月24日，疫苗接種率可以達到九成，通關指日可待，有人不明白確診人數急速上升，怎會是通關指日可待，大家唔明白，點解確診人數急升，就是太多人自己做檢測，多人做檢測，確診人數自然急升，我估計隔多幾日，確診人數就會大幅回落，老實說，我的估計經常不準確，但人一定要向樂觀方面著想，做一個樂觀的人，總好過做一個悲觀的人，狄更斯也是一樣，否則就不會話，這是最壞的時代，也是最好的時代。