多年前有老友被女朋友飛了，整天喊苦喊忽，話港女無情，我見勸無可勸，唯有講反話，話遇上一個無情女朋友是幾生修到的事，點解仲要喊苦喊忽，假如上天收到你的訊息，派一個整天喧寒問暖，跟出跟入，就算鬧都唔走女朋友比你，到時就會發覺，原來有一個無情女朋友是非常幸福，我都唔知道老友點解會接受我的解釋，總之他以後生活得很開心，就算再被女朋友飛都話好幸福，有人話老友痴了線，其實老友是看透世情，但很可惜，很多人到死的一日都唔明白箇中道理，可以說是白活了一生。
有老友問，如果被港女飛，應該採用什麼態度，是不是唱衰佢，當然不是，反而應該讚美佢，話自己冇福份，祝福她早日搵到另一男友，咁樣做不但大方得體，而且封了對方後路，前面則中門大開，咁好的男人，大把人搶住要。
我問一問國內金融才俊，以他的條件，點解要搵一個外貌毫不起眼，脾氣又大的港女做女朋友，如果他要，比他女朋友優勝百倍的國內女仔可以排幾條街咁多，才俊話真的不知點解，他與他的同輩對國內女仔的興趣不大，可能國內女仔知道他們的背景，對他們千依百順，冇厘刺激，他們反而鐘意港女，兩個字，無情。
而事實上多情與無情是很難分得清楚，例如一個男人與其他人去飲酒，他的女朋友又跟埋去，別人睇嚟是很多情，其實是無情，試問那個男人又點會飲得開心，笑得出嚟，杜牧先生早已看透世情，佢話多情卻似總無情，唯覺樽前笑不成，所以，女人無情是男人福份。
