橋頭堡與雙連地

　　昨日有不少報章以大篇幅報導恒基以508億奪得中環地王，比第二標高出136億，彷彿嘲笑李氏兄弟唔識行情，但我又唔見到有一份報章讚政府的招標策略成功，為庫房爭取多136億進賬，其實，自從政府採用招標制，已經受到不少壓力，要求恢復拍賣，如果用拍賣制，一般人都明白，地產商眉來眼去，又怎可以賣得高價。我並不是說地產商作弊，但大家在同一行業搵食，今日你放我一馬，下一次我就會退避三舍，庫房進賬減少，受害的都是香港人。

　　有人問我恒基買得貴唔貴，我認為如果恒基在附近沒有大型商業中心，不能起到協同效應，我會覺得稍貴，但是恒基在中環有如此多發展項目，地王起到的協同效應難以估計，正是千金難買雙連地，絕對唔貴，萬一地王落入其他發展商手中，就會多了一個競爭對手，出現負協同效應，令到恒基現有的商業地產項目有機會減值，一加一減，買貴37%又算什麼。

　　有老友問，除了恒基之外，是否任何地產商以這個價錢買入都是太貴，這又不能肯定，如果是國內地產商，為求在香港有一個優質地產項目，作為集團的橋頭堡，這個價錢又不能說是太貴，不過前提是要有足夠準備，否則左借右借，又要發債才可以湊夠錢買入地王，萬一樓市運行未如想像般暢順，樓價停滯不前，單是付息就可以拖垮整個企業，到那時候，買入地王的地產商就會覺得太貴。

　　恒基在奪得地王之後，立刻公開地王發展大計，有老友話點解咁心急，應該從詳計議，我話愈早發展，成本愈平，收益愈多，是貴買平用。