有老友問我有冇去書展，我話疫情下，雖然已經打了兩針，但咁多人地方，可免則免，而且我去書展都唔會買書，最多打下書釘，如果要打書釘，不如在屋企打，因為仲有很多書仍然未睇。
老友可能唔知道成熟投資者亦喜歡打書釘，而事實上不同年紀投資者對於投資物業有不同詮釋。年輕投資者鍾意買買賣賣，摸出摸入，就算買到一件優質貨都唔會長揸，賺多少錢就會賣走，跟著大宴親朋，物業代理最愛。
中年的投資者發覺當年買入的物業，如可不賣走，今日升幅驚人，於是只買不賣，什麼逢三退一都是廢話，恐怕捉到鹿唔識脫角，最後揸到成手貨，當遇上風吹草動，如果財力不足，手上的貨就會被銀行大手清理。
年紀比較大的投資者不時去睇樓盤，但很少還價，就算還價都是一個不合理低價，所以，物業代理最不喜歡年紀比較大的投資者，話他們只睇不買，只不過是打書釘。
