有老友話我寫文章咁耐，很少寫關於比特幣或者虛擬貨幣，是否我唔識，獻醜不如藏拙，最近比特幣大跌，如果我早一些發文叫大家小心比特幣，今日我就大出風頭，因為當時有不少中外專家話比特幣可以上到10萬美元，在專家做了預測之後，比特幣立刻從超過6萬美元下跌至3萬美元，雖然回升至4萬美元，但仍然唔見了三分一，老友話捉到鹿都唔識脫角，失去揚名立萬機會，我話有咁多人要搵食，我唔敢阻住他們，就算我發文警告，唔會有人認真去聽，因為玩比特幣是不會輸死人，點解我要做醜人。
老友話又不明白我的理論，我話如果入到一間賭場，見到一堆賭「大小」的人正在賭圍骰，是否要勸籲他們唔好賭錢，當然是不用，因為賭圍骰的人注碼很細，一定會輸，但唔會輸死，現在玩比特幣的人也是一樣，大多數買一個半個，買幾個已經很少，除了電動車佬之外，很少人買幾百幾千個比特幣，試問一個半個比特幣，只值幾萬美元，就算輸哂都唔會輸死，而電動車佬買比特幣的原意是一箭雙鵰，除了宣布可以用比特幣買電動車而令到銷量增加之外，比特幣亦會因購買力被確認而上升，但事實亦非如此，他雖然接受比特幣買電動車，但是他唔可以用比特幣出糧找數，到最後唯有暫停接受比特幣，幣價大跌亦是意料中事。
老友話不對，如果不是中國政府禁止虛擬貨幣交易，比特幣是不會大跌，我相信只是原因之一，但亦唔到中國政府不出手，因最近有文宣話在深圳有人賣了三層樓去買比特幣，在高峰時賺了超過一億元，有這類文宣就會令到很多人去賭，最後全副身家輸哂，就算輸死人都唔出奇，有此風險，中國政府禁虛擬貨幣亦是合適做法。
