香港人不應羨慕新加坡派錢

　　下星期香港財政預算案出台，坊間除了要求公務員減薪，收緊二元乘車優惠之外，亦有些少聲音要求政府派錢，但相信會愈來愈多，原因是新加坡政府剛剛宣布了財政預算案，除了有370億港元盈餘之外，仲向每個新加坡市民派800元坡紙，今次真係人比人，比死人，估計香港財赤千億，唔加稅已經算好，派錢應該無望。

　　有人叫我分析下新港兩地的管理，點解新加坡可以有盈餘兼派錢，而香港有千億財赤，派錢無望，我只能話，他強任他強，明月照大江，新港兩地的經濟環境不同，香港能夠現時的環境已經唔錯，正是各有前因莫羨人。

　　其實，香港人不應羨慕新加坡派錢，因為每次派錢之後，新加坡可能會加銷售稅，好彩今次派得少，估計加銷售稅的機會不大，不過，現時新加坡的銷售稅已經9%，再加就是雙位數，新加坡市民是很難捱。

　　如果香港政府開徵銷售稅，不但可以連年派錢，而且赤字會大幅下降，甚至出現盈餘，我相信基層市民不會接受，有錢佬就冇問題，沒有財赤，政府就不會考慮加稅，俾少少GST又算什麼，基層市民就唔同，以後用錢就要算過度過，所以，新加坡派錢又使乜羨慕，新加坡市民有苦自己知。

　　其實，新加坡政府想取消GST都不可能，原因是有大約萬億美元國債，今年只有370億港元盈餘，根本唔夠還息，唯有好似美國一樣不斷發債，實行以債冚息，否則就會出現赤字，仲要在適當時候加GST以彌補國債利息支出，不過在加GST之前一定派錢，所以，香港人點解要羨慕新加坡派錢。