新加坡打擊洗錢，恐失紐倫坡

　　我有一個做金融租客兩年前搬去新加坡，佢話香港對於資金流動，管得太嚴，即是唔可以洗錢，正所謂水清無魚，香港好快會失去金融中心地位，真係好嘅唔靈醜嘅靈，紐倫港變咗做紐倫坡，老實說，如果新加坡可以洗錢，香港永遠唔可以做返紐倫港。

　　另一個做金融業租客同我講，他並不是不想留在香港，但香港對於資金流動，真係管得太嚴，甚至客戶想在香港開戶口，都會被查家宅，最後都係開唔成，銀行解釋是因應美國的要求，如果稍有不慎，會被美國罰款罰到痴線，銀行寧缺勿濫，做少一單生意沒有影響，連戶口都開唔到，又點可以做金融中心，新加坡就唔同，唔好講到洗錢唔複雜，首先是開戶口是非常容易，唔會查家宅，以後資金流動更加冇人理，所以，新加坡可以輕易打抵香港。

　　大家唔好以為在香港，從銀行攞十萬八萬現金出嚟會被銀行職員問用嚟做乜，就算存十萬八萬入銀行，職員同樣會問點解有咁多錢存入銀行，最初的時候，很多人都不習慣，認為啲錢是自己的，攞錢存錢點樣用，點解要同銀行講，但現在已經習慣，在攞錢存錢之前，已經諗定一套說法，老實說，就算亂噏，銀行職員都不會質疑，他們就是要市民習慣，大額現金流動是受到監管，唔係咁容易洗錢，對於那些有機會洗錢的金融公司，當然唔會以香港為基地，新加坡是代替香港最好地方。

　　近日我有不少豪宅租客由新加坡轉到香港，我以為新加坡的生意做唔切，漏一些俾香港，原來唔係，原來是新加坡打擊洗錢活動，新租客話，如果新港兩地都唔可以洗錢，點解要去新加坡，由此推算，新加坡打擊洗錢活動，有機會不能做紐倫坡。