只有數字才可以如實報道

　　不時有海外朋友問我，香港現在是否正在處於水深火熱之中，就算他們唔相信外國傳媒，但香港傳媒不時報道樓宇蝕本買賣，以及商舖執笠消息，賺錢與開業的報道就絕無僅有，不免令人覺得香港現在的經濟情況極差，所以有不少人移民離開香港，不過，亦有海外朋友話，在外地旅遊的香港人所講的是另一回事，他們又唔係咁悲觀，究竟那些報道是否假新聞。

　　我問過傳媒朋友，點解經常報道不利香港消息，例如蝕本賣樓，但很少報道賺錢的交易，而事實上蝕錢與賺錢的物業交易是三七之比，三成蝕錢，七成賺錢，但傳媒很少報道賺錢新聞，傳媒朋友話他們只是順應時勢，因為香港人，尤其是海外的香港人唔鍾意睇到有利香港新聞，如果他們報道，某人賣了樓之後賺咗很多錢，那些新聞根本冇人睇。

　　樓宇買賣的賺蝕，很多人都心裡有數，所以，即使傳媒不斷報道蝕錢的交易，都唔會影響買樓的人心情，但商舖執笠又唔同，有一個執笠群組，日日報道有商舖執笠的消息，是否侵犯別人私隱不在話下，太多執笠報道，令人以為香港就快玩完，其實不破不立，有商舖執笠，亦有商舖開張，在2018年底，有2.7萬間食肆，在經歷社運與疫情，到了2023年底，食肆數字上升至 3.35萬間，我相信冇人會想到在這個困難情況下，食肆數字竟然會增加，所以，只有數字才可以如實報道，政府何不考慮，每月或者每季報道食肆數目，如果數目有所增加，大家就會知道，執笠只是另一個開始。