執笠關注組執笠

　　昨日早上去新城財經台做節目，本來打算講美國CPI高於預期，減息降溫，但仍未開始，主持人已經講執笠關注組執笠，想唔到這個關注組咁多人關注，其實，關注組的初心是很好，提醒市民經濟並不太好，生意很難做，搵到錢唔好亂咁使，就算要使錢都留港消費，幫到其他香港人。

　　不過，香港人有幸災樂禍心態，有咁樣的一個關注組，便盡情發揮，甚至攞一些舖位空置舊相放上關注組，令到打算幫襯的人以為該舖位的食肆已經執笠而唔去幫襯，對食肆經營者十分不公平，甚至將新相片放上關注組都會俾人刪除，谷主又未能修正，或者谷主是不打算修正，因為執笠才會吸到流量，但咁樣做很容易惹上官非，現在關注組執笠可能與此有關。

　　其實，如果執笠關注組真係關注執笠情況，就會了解食肆執笠的主要原因並不是關注組所講港人北上消費以及業主無良，而是人手長期不足，不少執笠的食肆在告示上寫上「因人手長期不足，不得不執笠」，政府官員如果在關注組睇到這個理由，就會考慮容許食肆輸入外勞，有足夠人手，食肆就不用執笠。

　　大家唔好以為政府不會體察民情，而事實上官員一直關注市民，若果唔係，就唔會撤銷打擊樓市辣招，在撤辣之後，樓市一天光晒，如果情況持續，地產商新樓盤可以去貨，就一定會買地，財赤可望解決，如果當時有辣招關注組，就會了解到辣招雖然將樓價壓落去，但做成成交量不足，冇人買樓收租，租金上升，就算不受辣招影響而可以買樓的初次置業者，亦因為樓價下跌而損失慘重，甚至變成一個負資產者，所以，執笠關注組亦不是壞事，不過就要如實報道，嘩衆取寵唔捱得幾耐。