市面上不時傳出一些生意平平無奇，但食物出品有質素的小店執笠，在執笠之前，那些小店的生意不知幾好，幫襯的人心態是蘇州過後冇艇搭，但事實上並非小店老闆想標尾會，做埋最後一輪生意，而是為了重新開業而刻意做的宣傳，一般鍾意寫負評食經的人，不但唔會對一間即將結業的小店口誅筆伐，甚至會大讚一番，無形中替那間小店宣傳，而小店在一輪操作之後，就會宣布
重開，到時自不然又再爆場，如果小店將出品服務的質素提高，不難可以成為一間名店，甚至可以攞到米芝蓮星。
很多人未必知道，太過負面的評論反而變成宣傳，在今年以來，只要大家睇報紙，就會睇到樓市劈價，業主蝕讓的消息，甚至多到唔想睇，但當大家睇真啲，就會了解到樓市今年在高息環境下，仍然有5個%升幅，租金更不在話下，上半年已經升超過10%，既然樓市唔係咁差，點解報紙講到好似樓價大冧咁大件事，其實報紙佬沒有機心，只不過是為了報紙銷量，語不驚人死不休而已。
亦有人話報紙的報道是有真憑實據，不少在5年前買了樓的業主至今仍然要蝕讓，事實勝於雄辯，大家再睇真啲，如果5年前那些業主冇買樓而買了股票，何止唔見咗10幾個%，現在可能一半都冇，買樓就算輸，都可以講是跑贏大市。
有老友話一定唔滿意報紙對樓市蝕讓的負面報道，老友誤會了，我不但以平常心面對，甚至鍾意那些負面報道，因為不少人睇到那些負面報道而主動了解真相，就會發覺，買樓輸錢的人的確有，但賺錢的比輸錢的更多，就算輸錢，仍然比買股票好得多，報紙的負面報道無形中替樓市宣傳，當全世界經濟回穩，利息下降，那些人就會第一時間去買樓，情況就好似一間執了笠小店重開，生意一定比以前更好。
重開，到時自不然又再爆場，如果小店將出品服務的質素提高，不難可以成為一間名店，甚至可以攞到米芝蓮星。