樓市雖然不好，但小心業主反價

　　昨日早上在公司開例會，有同事話早兩個星期打算以4500萬買的物業，最後業主反價，並且以5400萬賣了，問我要唔要鬧那位物業代理一餐，我話當然唔使，如果賣貴一百幾十萬，我一定會嘈那位物業代理，但賣貴兩成900萬，即是跑馬輸五個馬位，輸咗都唔好上訴，老實說，這個成交也是一個警號，打算買樓的人小心業主反價，大家千祈唔好以為我亂作，那位替我出價的物業代理知道真有其事。

　　有不少人唔同意我講，他們話報紙經常報道某些賣樓的業主要蝕讓五年內買入的單位，幅度大約一成，業主點解會反價，其實傳媒都唔了解物業市場，以為報道多幾次蝕讓，樓價就會下跌，其實，有資格賣樓的業主不是太多，只得一個自住單位當然冇資格賣樓，就算有兩、三個單位，如果那些業主有子女，他們亦冇資格賣樓，數數埋埋都唔係好多人有資格，所以，蝕一成賣樓已經是大新聞，如果五年前唔賣樓而買股票，恆指跌了四成，部分股票跌了一半，但報紙很少報道，基金行內人話，買樓就算輸，都跑贏大市。

　　雖然有一些投資者資金比較緊絀，甚至被人以地攤式賣樓，但嚴格來說，每一個物業都有很多水位，投資者最多賣走個人資產一成，便可以解決問題，當他們賣走一些物業之後，其他的不但會反價，甚至封盤，令到不少人很奇怪，樓市在成交量偏低，傳媒唱淡之下，業主反而會反價，但事實勝於雄辯，中原指數亦沒有下跌。