財爺打開口牌，向金管局施壓

　　有老友問財爺點解預先聲明，要同金管局商量放寬首次置業者的按揭成數，老友唔打麻雀，唔知道財爺正在打開口牌，向金管局施壓，金管局是不同意放寬按揭，但財爺承受各方壓力，因未能放寬按揭而資金受到影響的人正在怪責財爺，所以財爺話要同金管局商量。如果未能放寬，這是金管局的問題，如果放寬，財爺就會因利乘便領了這個大功，所以我估計金管局在無可奈何之下，被迫放寬首次置業者的按揭成數，繼而就會放寬所有物業的按揭成數，亦不是甚麼大不了的事，修正逆周期措施而已。

　　老友話唔怕一萬，最怕萬一，萬一金管局堅持，財爺雖然可以卸膊，但仍然是很冇面。如果金管局不肯放寬，真的很大件事，代表香港政府的管治出現問題。簡單來說，金管局兵變，大家唔好以為好似瓦格納軍團的普里戈任，率領幾萬人揮軍莫斯科才叫兵變。如果普京叫唔郁其他軍區司令，無人願意抵抗普里戈任，那些軍區司令亦是兵變，擁兵不發者也是兵變，估計其他軍區司令已宣誓效忠普京，所以普里戈任才率領瓦格納軍團返回軍營，最後仲要解散瓦格納，自己則解甲歸田，這就是兵變的代價，雖然普里戈任話自己冇兵變，但點解會由烏克蘭營地行兵700公里，直迫莫斯科，途中仲打落幾架飛機，令到13個飛行員陣亡，咁樣都唔自己唔係兵變，究竟點樣做才算是兵變。

　　我相信金管局唔敢兵變，財爺會與金管局總裁開會之後，就會宣布放寬首次置業者的按揭成數，如果唔放寬，兩人之中，起碼有一個，甚至兩位都要解甲歸田。