下一個理財中心：盧旺達

　　有老友為了子女讀書，打算一家用BNO移民去英國，但擔心在五年之後，英國不接納他們移民，到時唔知去邊度，唔通真係要咁衰仔返香港。

　　我話不用擔心，即使五年之後英國不接納他們移民，但亦早已為那些BNO搵定下一個目的地，就是非洲盧旺達。大家千祈唔好睇少盧旺達，現在外號叫非洲新加坡，以後就犀利，搞得好的話，應該是世界理財中心。

　　這個世界變化真的很大，如果不是俄烏衝突，瑞士沒收俄羅斯人財產，瑞士這個世界理財中心地位根本不可被替代，但沒收俄羅斯人財產之後，變相向全世界宣布放棄中立，任何國籍的人如果放錢在瑞士，只要他們的國家與別國有衝突，那些人在瑞士資產就會被沒收，結果就令不少富豪將他們放在瑞士的隱藏資產移走，做成一場不見存戶擠提的擠提，一間銀行冇錢，結果就是要執笠，瑞信就是在這個情況下被瑞銀收購，可以說瑞信已經執笠。我記得當俄羅斯人財產被瑞士沒收的時候，瑞士總統話瑞士沒有放棄中立，沒收財產並不代表放棄中立，總統點講都可以，客戶是會用腳來投票。

　　有人話，冇咗瑞士，益了新加坡，本來係，但是新加坡亦早已表態制裁俄羅斯，將資金放在新加坡與放在瑞士有同樣風險，所以，世界要搵一個新的理財中心。英國人早已深耕細作，搵定盧旺達做理財中心，估計將會有大量英國人移居去盧旺達。所以，就算五年之後不能夠去英國移民，最多是去盧旺達，甚至好過在英國，有乜好擔心。