過年前有老友話打算買走一、兩個物業，因為銀行同事對佢講，由於測量師行大幅調低他手上的物業估價，過年後可能會向他追收差額，不過，正月份就唔會，二月份就有機會，老友話，今次真係二月春風似剪刀。
老友的遭遇有很多投資者都即將面對，但我認為測量師行的估價報告有問題，嚴格來說，現在的估價報告沒有後盾支持，包括市場上的成交價，或者測量師行公開發表的樓市預測，只是鬼鬼鼠鼠個別將估價調低，迫使銀行要向業主追收差額，他們又可以多做生意，但是一份沒有後盾支持的估價報告是否值得信賴，這是有商確餘地。
我相信會有不少人發覺，在往年一月份，有不知幾多測量師行會舉行記者會發表該年樓市預測，今年就唔多見，理由是很簡單，他們對今年樓市走勢仍然未掌握得到，既然如此，又點夠膽開記者會。但話分兩頭，雖然唔敢公開發表，但私底下就會大幅下調物業的估值，迫使銀行向業主追收差額，最後令到樓價下跌，符合測量師去年第四季對今年樓市預測。
我相信不少人都睇到，在國內宣布1月8日通關之後，香港無論消費，投資，甚至樓市的氣氛截然不同，股市大幅反彈，比最低位的時候升幅接近五成，不少業主封盤，或者反價成交，如果測量師今年開記者會話樓市會大冧，可能會輸到俾人笑，所以，唔開記者會是最高的策略，萬一樓市下跌，就可以攞去年第四季的預測來頂檔，正是公死有肉食，婆死有肉食。不過，測量師可能唔知道，由於沒有後盾支持，他們所發出估價報告的說服力就會大為降低。
