香港樓市最儍的人

　　有人話好彩在踏入2023年之後，樓市出現反彈，否則我一定會俾人笑我是樓市最儍的人，如果唔係，點可能全香港的評論員都講樓市跌，只有我講樓市會升，而且樓市上升的理由是中港通關，因為在通關之後有不少國內人到香港買樓，而事實上，不少業界人士都認為在通關之後，大量國內業主到香港賣樓，樓價又點會唔跌。

　　老實說，好不容易等到通關，情況又的確好似我咁講，在通關之後，甚至未出現大量國內買家到香港之前，不少急於賣樓的業主立刻反價，甚至封盤不賣，與此同時，又唔見到有大量業主衝落嚟香港賣樓，有老友話，情況咁明顯，點解有人話在通關之後樓市因為有大量國內業主衝落嚟香港賣樓而大冧，那些人是不是儍的。

　　老友可能不明白，那些話通關之後樓市會大冧的人不但不是儍仔，而且非常精叻，不過，大多數不是業主，他們講通關之後樓市會大冧只不過是想嚇下有樓的朋友，並無惡意，他們的朋友亦會明白，那些人都冇樓，當然希望樓價下跌，根本無傷大雅，亦不值得介懷。

　　有一些是為了搵食，以通關樓市會大冧為理由，希望有業主相信他們而賣樓，就可以從中得到佣金，亦不能怪責他們，都是個句說話，只不過是搵食嗟，所以，他們點會是樓市最儍的人。

　　不過，有人講得出，就自然有人會相信，雖然唯數不多，但的確有人相信在通關之後樓價會大冧．在沒有迫切性的情況下將自住單位賣走，仲要加強語氣同其他人講通關之後樓市會大冧，他們才是樓市最儍的人，不過，牛唔飲水不能夠將牛頭撳低，他們亦不能怪任何人。