是否應該接納回流人士

　　有一個老友搵我，佢話有一個移民英國接近兩年的伙記打算回流，希望可以為佢效力，仲希望可以做返以前工作崗位，即是公司三把手。老友話，那位伙記的確是人材，又做得嘢，本來再請返佢是沒有問題，但要做回以前工作崗位比較困難，因為已經被他以前的下屬取代，所以，問我有冇遇到類似問題，如果有又如何處理。

　　我相信香港有不少老闆將會面對這個問題，其實，棄我去者，昨日之日不可留，如果離開的伙記唔返嚟就沒有下一句，亂我心者，今日之日多煩憂。在公司最困難的時候離開，現在香港復甦，他們話既然香港要搶人才，應該接受回流港人，接受回流人士不難，但難保有一日他們又再次離開，我對老友話，既然已經有人代了他伙記的位置，就唔好想咁多，香港現在搶人才，如果他的伙記有料的話，應該很容易搵到一份新工，而且又可以藉着新工來證明自己能力，這才是真材實料，就算回舊公司工作，難保唔會俾人話是老闆念舊情，並不是他的工作能力。

　　我識得很多老闆，真的是講一套，做一套，如果公開講是否會接受回流的職員，十個之中有九個半都話會，但私底下就話唔會，他們擔心並不是回流人士的工作能力，而是恐怕他們影響其他職員，令到別人有所誤會，以為可以隨時移民離開，唔適應又可以回流，唔會失了份工。至於有人話浪子回頭金不換，呃細佬而已，大人是唔會相信。