近日雖然唱淡樓市的消息如鋪天蓋地，樓價亦的確下跌，但有年輕朋友感覺到很困擾，既然大家都唱淡，究竟現在什麼人現在買樓，因為他最近亦有兩次機會買樓，但當他講話要買樓，旁邊一定會有人話現在不是時機，連老C都話樓價會大跌，點解要現在買樓，就算要買都等樓價跌多兩三成之後才買，他所睇啱的兩個單位最後俾人買咗，而且做價稍高，他搵唔返有類似單位，曾經俾意見的朋友就失了蹤，就算搵到，朋友都會話只是俾意見，是否買樓的決定權是在他自己手中，自己要做分析，不能夠全部聽哂別人意見。

　　我話現在或者在任何時間能夠買到樓的人都有一個共通點，就是不會問別人意見，甚至連父母，老婆都唔講，待一切事成之後才會講出嚟，因為叫別人唔好買樓是人類一個通病，而且只是叫睇定啲，或者等樓價再下跌才買，善意的提醒，就算唔買之後樓價飆升，都唔可以怪他們，所以，唔問其他人意見是買樓的一步。

　　現在所有專家都講得冇錯，樓市的確下調，但願意低價賣樓的業主不是太多，否則專家就不會叫政府撤銷SSD，因為撤銷SSD可以增加供應，由此可見，市面上低於市價出售的單位不是很多，當中有不少是低層，方向不佳的劣質單位。所以，如果見到適合自己單位，唔好同其他人講，就算講咗都唔好理他們的意見，而且樓市同股市都是一樣，可以隨時掉頭回升，拉都拉唔住，不但適合自己的單位被其他人買走，甚至一些比較差的單位亦會提高叫價，到時候就後悔莫及，不過，很多人都試過這個情景，我亦不例外，試過幾次之後，買樓之前就唔會話俾其他人知道。