有開財務公司老友話，最近的銀主盤多了很多，是環球金融海嘯之後最多，我在2015年寫的「細價樓爆煲論」，今日有機會爆煲，問我知唔知點解，我話各位財仔大哥食完大雞三味，細價樓就會爆煲，一般人以為樓市很差才會出現細價樓爆煲，其實，樓市上升亦會出現細價樓爆煲，只不過是時間可能會延長一點，不會不出現。
很多人不知道什麼是大雞三味，簡單來說，就是一隻雞用三種烹調方法，我細個時阿媽食譜就是大騸雞煲牛白腩，金針雲耳蒸雞，芙翅（雞雜）炒菜，以前食到最後，一定會剩番啲菜，現在時代進步，蔬菜一早清倉，剩下的是雞同牛白腩。
當一個業主攞層樓問財務公司借錢，財仔就會煲水掹雞毛，準備大騸雞煲牛白腩，一般來說，如果借五成以下根本不用審查，利息亦唔貴，年利率大約8％，債仔有了錢就身痕，彷彿那些錢是自己賺到，而且只是還息不還本，一般債仔在兩年內到冇問題，兩年之後，有不少債仔本息都不還，但財仔的容忍到是很大，如此這般又過了一年，財仔開始追數，債仔冇得還又如何應對。
財仔開始煮第二味雞，會對債仔話有另一間財務公司可以幫手，物業可以借到六成半，不過利息就要貴些少，年利率要12％，債仔千多萬謝，佢唔知道自己係雞，財仔用金針雲耳屈佢。
去到這個地埗，財仔洗定菜，準備快炒芙翅，不出半年，債仔還唔到息，於是問財仔有冇人可以幫手，一定有，不過利息要24％，幾個月之後，那個物業就會變成銀主盤，銀主盤增加，細價樓亦開始爆煲。不過，時代進步，不少債仔知道自己物業始終會變成銀主盤，於是劈價賣樓，當記者問那些業主點解要賣樓，答案千篇一律話加息，大家唔明白最多只是加息2％，點解要驚到賣樓，原來他們擔心的是財仔加息。
