千祈唔好叫人賣樓而自己買樓

　　我小時候見到一個長輩經常叫人唔好去賭錢，最後冇哂朋友，不少人以為是忠言逆耳，其實這不是主要原因，原來長輩亦不時去賭場賭錢，當有人問點解佢可以去賭錢而叫其他人唔好去賭，長輩話佢輸得起，其他人輸唔起，老實說，這個答案，想有朋友都難。

　　有老友話咁多年來，佢只聽到我話時勢不佳，如果買樓就要小心一些，除了量力而為之外，一定要揀一些優質單位，鋤價反而是其次，但從未聽過我叫人賣樓，老友不明白，我是一個物業投資者，無論樓市幾咁差，我都有機會買樓，如果被人知道一定會被質疑，點解我買樓而叫其他人賣樓，如果我話我輸得起，他們輸唔起，我相信結果好似我的長輩一樣，冇哂朋友。

　　現在唱淡樓市的消息鋪天蓋地，甚至有玄學家都不理會涉漏天機，冒著天譴危險叫人賣樓，當我覺得玄學家很偉大的時候，有老友話玄學家根本沒有涉漏天機，怕什麼天譴，原來玄學家亦有買樓，老實說，如果唔係知道樓市向好，又點會現在買樓，所以，他並沒有涉漏天機。

　　至於大行話兩年內樓價跌三成，大行當然有理據，但我的經驗就是當有大行發出類似預測，該大行或者同行就會向業主開價買他們的優質物業，而且價錢不低，甚至高於市價，很多業主不能抗拒大行誘惑而將手上優質物業賣走，話哂都有兩三成溢價，老實說，現在做業主真慘，被所有人打到頭崩額裂，少啲定力都會將手上優質物業賣走。