新加坡華瑞基金以207億買入長實波佬道152個豪宅單位，有傳媒話華瑞以高價接誠哥貨，都唔知個「死」字點寫，不過，除了發表文章的傳媒外，不少評論員話華瑞買得貴，尤其是現在樓市正在下行的時候，點解唔等遲吓才買，不少著名分析員已經話樓市會跌15-20％，等多陣都唔得。
有老友話是否買得貴真的不是那些局外人可以評論，況且買得貴是對香港有利，點解要發表負面文章及評論，嚇走打算在香港買樓投資的外國資金，點解唔可以話歡迎來港投資。
我同老友講，我在世界各地都買過樓，除了紐約之外，其他所有地方，無論是北京倫敦新加坡，當地人一定話我買得貴，這是人之常情，香港人亦不例外，所以，希望到香港投資的外地資金唔好介意，但我相信那些基金亦了解到這個情況，不會將傳媒的倒米報道放在心上，雖然大多數城市的人都會話到當地買樓的外來人買得貴，但傳媒是不會報道，因為傳媒知道，這是當地人的條件反射而已，隔幾年之後，當地人又會話樓價被那些過江龍炒起，言下之意，樓價升了唔少，有多少食唔到葡萄的滋味。
至於點解外來人會買貴樓，其實，一般人到其他地方買樓，寧願畀多一些錢都要買高層，最優質的單位，令到當地人錯覺外來人買貴樓，而事實上兩者是有所不同，很難作出直接比較，一般來說，在一幢住宅大廈，高層業主大多數是外地人，本地人未必捨得畀多兩三成樓價買一個高層單位，所以，當他們一齊坐電梯時，本地人就會話外來人層樓買得太貴。
