只有失去才懂得擁有

　　有老友問點解全香港都睇淡樓市，我不斷發叫人唔好賣了自住樓。我話只有失去才懂得擁有，我是過來人，曾經兩次在沒有迫切性的情況下賣了自住樓，結果很辛苦才買得返，而且，質素比以前的單位差很多。最後我答應自己，只有換樓才可以賣走自住單位，結果我又食言，就算是換樓，買了新單位都唔會賣走舊自住單位，才可以愈買愈多，我只不過是將我的痛苦與經驗寫出來，真的是信不信由你。

　　今日有很多賣樓的人，都唔知道點解要賣樓，如果是移民就無話可說，財困就唔會講，大多數人會話擔心加息。我問過兩位擔心加息而賣樓的人，一位只是借了樓價一半，我反問點解要擔心加息，一位是借了九成，我話如果可以借九成，即是承受得起壓力測試，點解要擔心加息，擔心加息只是人云亦云，心魔而已。而事實上現在買樓的人有不少都是八九成按揭，唔通他們唔驚，無它，他們只是做足壓力測試。除了可以承受3%額外支出的利息，亦留足夠儲備作不時之需。如果業主有足夠準備，點解要擔心加息，甚至擔心到要賣樓。

　　現在賣樓的人有一個共通點，不但只得一個自住單位，而且是首次置業者，他們從未失去，唔懂得什麼才是擁有，以為將單位賣走之後，很容易買得返。而事實上當他們成功賣樓之後，如果樓市沒有大跌，他們就會嘗試到失去的滋味，如果再買樓，就唔會咁輕易賣樓，因為他們懂得擁有原來是多麼矜貴。