有朋友賣了樓之後表示成身鬆晒，對於仍然揸住層樓又欠落銀行成身債的人深表同情，我話子非魚，焉知魚之樂，那些有層樓又會話沒有樓的人非常不安全，雖然話可以租樓住，但主動權始終不是在自己手中，業主話唔租咁就要四圍撲樓，所以，我一向都唔會反對別人賣樓，因為只要他們嘗試過不斷租樓搬屋的辛苦，隔了一段時間，那些曾經賣樓的人就算幾辛苦都會再買樓。

　　那位剛剛賣了樓的朋友話一定唔會再買樓，我認為唔好講得咁肯定，這兩年有24萬移民離開香港的人，誓神劈願話唔會回流，但在消費券誘惑之下，有超過10萬人證明他們已經回流甚至沒有離開香港，今日，不少大大聲話賣樓的人，最後發覺他們不但沒有賣樓，甚至趁低吸納，利用家人的配額買多一兩個單位。

　　有很多打算賣樓的業主認為租樓一定沒有問題，唔租東家租西家，香港有咁多人買樓收租，點會租唔到樓。那些賣樓業主想法已經過時，以前的確有很多人買樓收租，但政府推出壓抑樓市措施之後，香港人買第二個住宅單位收租要付15％辣招稅，令到買樓收租的人愈來愈少，就算有樓收租的業主，亦可能因為子女成長，將部分收租單位給他們居住，令到市場上能夠出租的單位愈來愈少，今日賣了樓的人除了擔心買唔返，更加要擔心租唔返，買唔返可以繼續租樓住，如果業主收樓又租唔到樓就很大件事，朋友話我危言聳聽，朋友可能搞錯，危言聳聽的人並不是我，而是整日話樓市會大冧的人。