龐大購買力令專家睇淡樓市

　　近日差不多所有專家都睇淡樓市，所持理由不外乎加息以及移民潮，老實說，全球加息是免不了的事，香港也不會例外，但好彩加息話事人欠債太多，加息只是割韭菜的一個步驟，但加得太多以及太久即是搵自己老襯，美國多加1％就每年要多付3000億利息，現在已經加了1.5％，估計7月尾美聯儲局加息0.75％，美國每年要多付6675億利息支出，唔可以捱得幾耐，美國政府買完債之後就會減息，甚至7月尾已經是利息高峰，香港就算要加息，我相信加1％已經可以，極其量加多1％，4％供樓利率雖然比現在多一倍，但如果問銀行借錢買樓，做過壓力測試，相信絕大部份業主都可以捱得住，問財務機構借錢或者用呼吸plan 買樓的業主則例外。

　　移民潮的確嚴重，否則政府就不用以消費券篩選那些長期離港的人，但移民之中，有樓的業主其實不多，我去年初在城市論壇與各路英雄講及移民潮，他們話有消息指出，移民將會帶走2800億資金，大部分是賣樓所得，但最近資料顯示，沒有2800億那麼多，只得280億，所以，移民潮一定會影響樓市，但並不會令樓價大跌。

　　我有一件事覺得很奇怪，就是當每一次樓市市況不佳，就會有專家叫政府撤辣，但今次全面性睇淡樓市，又唔見有專家叫政府撤辣，其實大家都知道，在通關之後，一定會有很多國內人來港買樓，香港要消化這股龐大購買力，就一定要有足夠業主出售他們的單位，但如何令業主出售他們的單位，最好辦法就是睇淡樓市，這就是近日不少人睇淡樓市的主要原因，不過，亦有不少專家未必掌握到事實根據，人云亦云而已。