近兩日有不少人同我講，香港政府真係冇用，連一隻海鮮舫都救唔到，我話殺人生意有人做，蝕本生意冇人做，珍寶海鮮舫長期蝕本，而且蝕得好勁，唔做又有什麼出奇，亦唔輪到政府去救，如果政府支助珍寶海鮮舫，我相信有不少衛道之士立刻行出嚟話政府浪費公帑，林鄭捱下義氣處理好這件事，李家超就不用煩腦，由此證明，林鄭與李家超是有默契，今次交捧將會是成功。
我問那些投訴的人，有幾耐冇去過珍寶海鮮舫，成班人最近的一次幫襯已經是十年前，當中有人竟然從未去過海鮮舫，既然如此，講什麼集體回憶，老實說，政府冇可能救到珍寶海鮮舫，要救就由市民去救，做法很簡單，多啲去食飯，有生意就唔會執笠，唔好知道要執笠就質疑政府點解唔救。
我有一個老友的酒樓突然結業，我問點解唔早一些通知，等一些熟客可以打卡，做多一個半個月生意，估計一定會很好。老友話費事眼寃，那些到來打咭的人會話出品很好，服務又佳，老闆又好人，執笠之後會非常懷念，老友話“挑”，如果出品好服務佳就多啲幫襯，有生意就唔會執笠，正式貓哭老鼠，我同意老友所講，在疫情前我每年都會幫襯珍寶海鮮舫兩三次，尤其是出海之後，但我仍然不會懷念，或者會有人話我是冷血的，其實，舊的不去，新的不來，話唔定很快就會有一隻新的海鮮舫，老實說，重新開一間新的海鮮舫容易過做一隻長期蝕緊錢的海鮮舫。
