我有一個老友，一向持有不少現金，又鍾意投資物業，但是他對炒家很有成見，認為同炒家買樓如火中取栗，寧願自己辛辛苦苦在市場慢慢揀，慢慢搵，但始終搵唔到好貨，雖然買了不少物業，但嚴格來說，稱不上是優質物業，他自問俾足價，又唔會減佣金，點解買唔到優質物業，他百思不得其解。
老友唔明白，他雖然表面上沒有減佣金，其實是減了很多，以前，一般優質物業是不會被物業代理直接介紹給用家或者長線投資者，他們會只將物業介紹給炒家，然後再介紹給用家及長線投資者，這樣他們可以多收炒家買入賣出的佣金，比直接介紹給投資者多了雙倍佣金，現在有多少不同，炒家已經不多，用家或者長線投資者如果俾足佣金的話，一樣可以買到優質物業。
除了老友之外，有不少人不願意同炒家買樓，他們認為買家過水濕腳，無端端將成本加大了10%，但是他們不知道，炒家賺這10%不但是要成本，而且是有風險，如果在成交期之前賣不出，他們要撻訂或者上會成交，無形中將成本加大，很多時炒家賺幾次短炒，都唔夠蝕一次，所以，炒家必定嚴格挑選打算買入的物業，並且將價錢壓到最低，這樣他們才可以將風險減到最低，同時確保有一定利潤。有一個咁盡責把關的人，點解要自己咁辛苦在市場上揀來揀去，最後可能揀個爛燈盞。
老友始終話同炒家買樓是火中取栗，我於是同老友去買栗子，小販用鐵砂炒到鑊中栗子仆仆聲，小販問老友要邊粒栗子，他會替他夾出嚟，老友當然揀最好的。食完之後，老友非常滿意，他終於明白火中取栗的真正意思，俾貴些少都值得。老友嘆氣，如果二十年前明白這個道理，現在搵多很多錢。
