近日唔知點解，傳媒以負面姿態鋪天蓋地報導不少業主蝕讓賣樓，但我又唔覺得太壞，樓市有承接就不是太壞，至於點解要蝕讓，就有很多因素，最有可能是當日買樓的時候是非常恐懼，擔心愈遲愈貴，給業主一個提價機會，換句話說，是當時買貴咗，如果唔係，今日就不用蝕讓。
我問十個人，有九個答唔到。市場上最冷靜的買家是什麼人，大多數會話資深投資者，其實，投資者不但絕不冷靜，甚至有時會很衝動，否則就唔叫做投資者。在投資的學問裡，冷靜只比失敗高一級，如果唔係，又點會出現「快狠準」。
我一向認為，對市場最了解的是租客，在租約接近到期的時候，如果我的租客同我講，暫時續租三個月，到時再傾新租約，我知道市況不太好。反之，租客話續租三年加三年，最好係死約，我知道市況大好。所以，我一向非常尊重租客意見，租客是瞓身落去做生意，業主收租，夫死夫還在，租客唔掂，物業仍然在業主手裡，大不了搵過另一個租客。
租客租樓，即使是長租，都未必是樓市最好時候，當租客買樓，我夠膽講，樓市即將邁向高峰，不過，唔會有人相信。不少人認為，業主唔夠租客了解市況，似是而非的說話，其實，這是似非而是，租客點解要買樓，因為租唔到樓，現在市場上有業主或者包租要求租客交一年租金，代表市場的租盤奇缺，有實力的租客就會考慮買樓。
