香港樓市由 2003 年觸底反彈，除咗 2008 年華爾街金融風暴嘅短暫震蕩外，中原城市領先指數由底谷嘅 30 一直凱歌猛進，到 2020 年嘅歷史頂峰 191.34，升咗六倍有突，難怪我有唔少老友連生意都唔做，個份靚工都唔打，唔想睇老細面色，乾脆辭咗份工做起專職炒家。

　　老友記王文彥，仲喺中原同施永青都係大股東，近水樓台先得月，當然喺呢個香港樓市嘅超巨浪上面滑翔，兩位都賺到盤滿砵滿，不在話下。但自 2018 年到 2020 年尾，中原城市領先指數喺 2019 年初嘅低點 169.95， 五年來喺 170 到 190 點間一直橫行震蕩後，卒之穿底下行。老施呼籲港府撤辣，特首當然聽老行專講嘢，不過樓市稍有短暫嘅 10 點反彈後又拾級而下，並冇重啟牛氣。睇來大陸經濟正處於調整，北水南調冇乜料到。反而班平日食慣魚翅撈飯嘅炒家（其實我講啫，佢哋好慳皮），估計唸法同老施一樣以為樓市會重返升軌，又入市摸貨。諗唔到中原城市領先指數唔爭氣，最近有唔少細炒家蝕讓離場。我估計呢啲細炒家一睇勢色唔對，又騰雞被銀行 Call Loan，唯有死死下棄將保帥。雖然幾個月就蝕咗十個巴仙，加上其他洗費真係幾甘，不過我嘅睇法係蝕少當贏，因為我認為樓市仲有排跌，前路茫茫也。我唔同意老施最近嘅睇法，話年底樓市會止跌回升，如果真係，都係減磅好時機。

　　好明白自 2003 年呢十幾二十年樓市牛氣沖天，大家都習慣咗磚頭嘅不停增值，近五年的橫行並冇影響呢啲樂觀情緒。原因係香港高樓價嘅兩大基本面因素正發生巨大變化：其一，多年來大陸得益嘅全球化正發生質嘅變化，香港作為大陸同埋歐美嘅橋樑已經一去不返；其二，香港作為亞洲最重要嘅金融中心正在褪色中，冇咗金融大鱷班友，香港根本無法支撐得住依家昂貴嘅地產價格及寫字樓租金。今日靠收租嘅大地產商，唔係減少少利息就以為可以渡過目前嘅現金流乾涸嘅困境。到時候會有更誇張嘅新樓劈價潮自救，舊樓更冇人吼。當然希望係太悲觀，唔會發生。