地產博客
瀏覽人次:22522    回應:1
文亮言

俾足佣並不一定買到優質物業

 

湯文亮博士

紀惠集團行政總裁
2021年4月20日

  有人話做物業投資者易過借火,就是俾足佣,俾足佣,俾足佣,只要俾足佣,自然會有物業代理做嘢,根本唔使自己做,我聽到之後覺得很奇怪,唔通那個人去食飯唔係照價埋單,買賣物業梗係要俾足佣,講嚟都多餘,仲要講三次咁多。

  是否能夠買入或者賣出一個單位,物業代理是關鍵人物,不過很奇怪,這個關鍵人物經常不被尊重,甚至比買家賣家呼呼喝喝,就算去飲茶食飯,很多時都由物業代理埋單,理由是俾足佣,其實,只要對那些物業代理好一些,尊重他們,不要他們埋單,自然會有物業代理樂於效勞,不過,仍然要俾足佣。

  另一個方法就是要俾一個希望給物業代理,就是他們替買家買入一個物業之前,買家表示買入之後如果啱價可以摸走,不過只限工商物業,令到物業代理有一個憧憬在短期內可以多做一單生意了,如果有得揀,任何物業代理都會將物業介紹給那個打算將物業摸走的炒家,即使那位炒家平時呼呼喝喝,又唔尊重物業代理,我即是話,由於物業價值很高,相對佣金亦很高,能夠做多一轉,收入會多很多,老友都冇情講,既然大家都是利字當頭,不如用一個誘敵之計,令到物業代理以為可以多做一單生意,多收佣金,介紹一些優質物業比自己。

  有人過猶不及,與物業代理非常老友,以為一定可以攞到最新最好樓盤,有需要時物業代理又會落力替他們鋤價,其實是錯到不得了,在有需要時,物業代理的確是會鋤價,不過是鋤返轉頭,愈老友愈鋤,愈差的物業愈會介紹給與他們老友的買家,所以,除了尊重之外,對物業代理應該採用不可以不親近,不可以太親近態度,如果你不是資深投資者,未必會明白我寫什麼,或者會話,俾足佣就可以,不用講咁多。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

回應者名稱
密碼
2. 引刀一快 2021-04-20 13:00:45
俾足佣係必須,咪信足人係戒條。
尤其做商鋪果啲,千錘百煉,人間精氣神。