地產博客
瀏覽人次:20441    回應:13
文亮言
一個連官員都不敢講小心的樓市
 
湯文亮博士
紀惠集團行政總裁
2018年1月10日

  雖然2018年第一次公佈的樓價指數輕微下跌,但樓市仍然在一片唱好聲中,不但大多數專業人士,評論員都表示樓市只會升不會跌,睇淡樓市的人都變成少數族裔人士,但最大鑊的就算他們睇淡都不敢說出來,否則就受到圍攻,如果唱淡的人有樓,就會被人質疑既然是睇淡,點解唔賣樓,如果那些人買樓就更大件事,一定會被人話唱淡入貨,如果唱淡的人沒有樓,就會被人話因為沒有樓,所以一定會唱淡,總之,睇淡樓市的人無論他有沒有物業,最終都會被人說成他是有目的而唱淡。

  一般評論員已經不敢唱淡樓市,除了樓市的表現的確與他們所說的是相反之外,亦會惹來不少麻煩,現在除了一般市民外,官員們亦不敢唱淡樓市,甚至連叫大家小心都不敢,市場上只得一種唱好樓市的聲音,大家明知道這是非常危險,但大多數人都會明哲保身,可以不說便不說,做好自己的防禦工作便可以,因為如果樓市繼續上升,下跌時的幅度必定很大,即使有足夠防禦,都一定會受到創傷,不過,只是希望可以復原自己的創傷,至於其他人的創傷,就不能夠顧及得到。

  當樓市急速下跌,並不是現在買樓,或者用高成數買樓的人受到傷害,而是整個社會都會受到牽連,經濟環境亦會因此而轉壞,所以,我認為即使官員們是有所顧慮,但仍然要提醒市民利息上升,供應增加,美國縮表令到留港的資金溜走,首先令樓市下跌,繼而傷及其他各行各業,要復原並不是一朝一夕,屆時,政府當然可以推出一些惠民政策,例如免息貸款等來解決問題,但這對於循規蹈矩的市民就不公平,所以,我認為官員們即使有壓力,都應該提醒市民,不過,他們亦要積極解決令樓市上升老問題,就是要增加供應,如果官員們明知道做唔到,只是叫市民小心反而是失職,應該改口說有買趁手,否則是閣下自誤。

 
我要回應
我的稱呼
回應 / 意見
驗証文字
 
回應 / 留言規則
  1. 禁止撰寫粗言穢語、誹謗、渲染色情暴力或人身攻擊的言論;
  2. 禁止以名稱/暱稱/綽號/同音字等批評或映射任何人士、機構、公司;
  3. 禁止發佈有關招聘、推銷、廣告等內容;
  4. 禁止公開任何個人資料(如電話號碼、電郵地址、即時通訊帳號等)。

敬請留言者自律。本網站保留刪除/堵截任何留言的權利。

回應者名稱
密碼
1. 真真薯片 2018-01-10 09:24:26
第1, 高官以前叫人小心之後, 自己真係去左買樓

第2, 高官們似乎心知增加供應無望, 推地要就住就住, 想靠農地補地價賣數, 不過唔敢講出口

所以高官唔出聲, 係最好既選擇, 起碼自己可以買樓, 遲d升左唔關佢事, 今次我撐高官
2. 儍強 2018-01-10 09:31:18
過去多年經官員明知土地供應不足,才曰曰捉醒市民不要心急上車,自己卻用天價入市。口不對心,市場大衆看在眼裡,自不然條氣唔順。
3. 僭建效應利好樓市 2018-01-10 09:37:39
好多高官都涉及僭建問題,佢地的行為向大衆發出了一個信息,香港居住是大問題,連高官都付不起地價同差餉。大衆看在眼裡,當然個個都心急上車。誰還會相信樓價會下跌?
4. 真真薯片 2018-01-10 09:52:17
689明知推唔到足夠供應, 但係仍然指示高官講大話叫人小心, 高官心裡不服, 唯有用行動買樓表示不滿

林鄭老實過689, 林鄭心知供應有排都未到位, 所以指示高官唔好講大過, 結果就冇人再講小心

5. 十一哥 2018-01-10 09:57:40
爆㷛衹係一個形容詞概念、爆㷛定義因人而異、高官揾到銀…買貴咗最多揼春、而家監硬上車嘅…動機係想贏…本質即係賭…冇得防禦…得就笑…輸就跳、話自住嘅…上得車即係有排住啦!梗計掂數住得起先落叠、升就得啖笑…回亦唔洗跳 !  住…實質冇分別。


6. 收口 2018-01-10 12:00:32
高官包括林鄭以後最好不要日日講樓市,搞到好似人人以後要瞓街咁。樓市新聞日日在頭板,樓價本來跌的都被嚇到升。
7. 湯瑪斯 2018-01-10 12:23:12
高官叫市民小心,係針對財力未能防御加息所帶來風險的市民,所以市民入市需量力而為。該高官財力足以購買三千多萬的樓,他去買樓沒有問題,湯博士都撰文話他沒有問題。如果該高官買三億幾的屋,樓價大大超過他的防御能力先至算係觀奇洋服 -「講一套,做(造)一套」。
8. 真誠想有調整的博士 2018-01-10 12:28:22
可不必理会會他人
大可继續唱淡示警
點解怕人啃呢?
9. 鳥5 2018-01-10 13:07:50
十一哥見D慧根,外境本無常,冇人可以玩死人,但自己玩死自己,~其實比比皆是。。。
10. 說3道4 2018-01-10 15:05:42
高官幾十萬月薪,當然供得起,買得起,警惕是對一般市民的。

11. 老僧 2018-01-10 16:33:41
只要我手寫我心  ,
有理有據地發表意見,
即使事後證明個人預測錯誤 ,
亦不必歉疚.


12. 老僧 2018-01-10 16:40:13
對一般小市民 , 自置居所可能是一生人最大的投資.

投資, 基本上考慮兩方面 :
1.   值博率 ;
2.   風險承受能力

計完數 , 願意去就去 , 不願意去就別去 ;
萬一錯了 , 當作學習 , 請別諉過他人.
13. 老僧 2018-01-10 17:01:18
CY , 我信佢真心 愛黨愛國 ;
林鄭..... ?!

CY , 我信佢真心 為香港基層市民 ;
林鄭..... ?!

CY , 我信佢真心 搵地做地起樓 ;
林鄭..... ?!